మోడీ హైదరాబాద్ పర్యటన తేదీ ఖరారు – రెండవ వందే భారత్ రైలును ప్రారంభించనున్న ప్రధాని

ప్రధాని మోదీ హైదరాబాద్ పర్యటన తేదీ ఖరారైంది. ఏప్రిల్ 8న హైదరాబాద్ రానున్న ప్రధాని.. ఈ పర్యటనలో కొన్ని అభివృద్ధి పనులకు శంకుస్థాపన చేయనున్నారు. సికింద్రాబాద్-తిరుపతి మధ్య నడిచే వందే భారత్ ఎక్స్‌ప్రెస్ రైలును ప్రధాని మోదీ ప్రారంభించనున్నారు. తెలుగు రాష్ట్రాల మధ్య నడిచే రెండో వందే భారత్ రైలు ఇది. అదే సమయంలో సికింద్రాబాద్ రైల్వే స్టేషన్ ఆధునీకరణ పనులకు కూడా ప్రధాని శంకుస్థాపన చేయనున్నారు. ఈ రెండు కార్యక్రమాలకు సంబంధించి రైల్వే శాఖ అధికారులు అన్ని ఏర్పాట్లను సిద్ధం చేశారు.

తెలుగు రాష్ట్రాలు, దక్షిణ మధ్య రైల్వే మధ్య రెండో వందే భారత్ రైలును సికింద్రాబాద్-తిరుపతి మధ్య నడపాలని నిర్ణయించారు. ఈ మార్గంలో ఇప్పటికే ట్రయల్ రన్ పూర్తయింది. సికింద్రాబాద్ నుంచి తిరుపతి వరకు మూడు రైల్వే లైన్లలో వందేభారత్ రైలు వెళ్లే మార్గాన్ని అధికారులు అధ్యయనం చేసి ఖరారు చేశారు. బీబీనగర్, ఖాజీపేట, విజయవాడ మీదుగా రైలు నడపడంపై అధ్యయనం చేశారు.

ప్రస్తుతం నారాయణాద్రి ఎక్స్‌ప్రెస్ నడుపుతున్న మార్గంలోనే ఈ వందేభారత్ రైలును నడపాలని రైల్వే అధికారులు నిర్ణయానికి వచ్చినట్లు తెలుస్తోంది. సికింద్రాబాద్-బీబీ నగర్, నల్గొండ, గుంటూరు, తెనాలి, నెల్లూరు, గూడూరు, శ్రీకాళహస్తి మీదుగా తిరుపతికి నడపాలని సూత్రప్రాయంగా నిర్ణయం తీసుకున్నట్లు తెలుస్తోంది. మరోవైపు ఇదే సమయంలో పిడుగురాళ్ల నుంచి శావల్యాపురం మీదుగా ఒంగోలు, నెల్లూరు, గూడూరు, శ్రీకాళహస్తి మీదుగా నడిపేందుకు అధికారులు సర్వే కూడా నిర్వహించారు. ఈ వందేభారత్ రైలును నారాయణాద్రి ఎక్స్‌ప్రెస్‌ మార్గంలో పుదుగూరి వరకు నడిపి అక్కడి నుంచి శావల్యాపురం వైపు మళ్లించే యోచనలో ఉన్నట్లు తెలుస్తోంది.

ప్రస్తుతం 12 గంటలు, వందే భారత్‌తో 7 గంటల కంటే తక్కువ
ప్రస్తుతం సికింద్రాబాద్-తిరుపతి మధ్య నడిచే ఎక్స్‌ప్రెస్ రైళ్లు, సూపర్ ఫాస్ట్ ఎక్స్‌ప్రెస్ రైళ్లకు 12 గంటల సమయం పడుతోంది. అదే వందే భారత్ రైలు అందుబాటులోకి వస్తే ప్రయాణ సమయం కేవలం 6 నుంచి 7 గంటలు తగ్గే అవకాశం ఉంది.

రెండు తెలుగు రాష్ట్రాల మధ్య జనవరి 15న ప్రారంభించిన సికింద్రాబాద్-విశాఖపట్నం వందే భారత్ రైలు విజయవంతంగా నడుస్తోంది. ఈ రైలు రాకతో రెండు రాష్ట్రాల మధ్య ప్రయాణ సమయం దాదాపు 4 గంటలకు తగ్గింది.