ఏపీలోని అన్ని దేవాలయాల్లో ఆన్‌లైన్ సేవలకు ప్రభుత్వం నిర్ణయం: మంత్రి కొట్టు సత్యనారాయణ

ఏపీ వ్యాప్తంగా 175 ఆలయాల్లో పూర్తి కంప్యూటరీకరణ చేస్తున్నామని డిప్యూటీ సీఎం, రాష్ట్ర దేవాదాయ శాఖ మంత్రి కొట్టు సత్యనారాయణ వెల్లడించారు. ప్రైవేట్ సాఫ్ట్ వేర్ కంపెనీ భాగస్వామ్యంతో కంప్యూటరీకరణ చేస్తున్నామని తెలిపారు.
ధార్మిక శాఖ అధికారులతో సమావేశం..
2023 జనవరి 31 నాటికి రాష్ట్రవ్యాప్తంగా ఉన్న ఆలయాలను పూర్తిగా కంప్యూటరీకరించాలని 9&9 సాఫ్ట్‌వేర్ కంపెనీకి మంత్రి కొట్టు సత్యనారాయణ సూచించారు. ఆదేశించారు. దీని ద్వారా అవినీతికి తావులేకుండా భక్తులకు మెరుగైన సేవలు అందిస్తామన్నారు. ఇప్పటికే 16 ఆలయాల్లో కంప్యూటరీకరణ సేవలు సత్ఫలితాలను ఇస్తున్నాయన్నారు. బుధవారం విజయవాడలోని దేవాదాయ శాఖ క్యాంపు కార్యాలయంలో ఆ శాఖ మంత్రి కొట్టు సత్యనారాయణ దేవాదాయ శాఖ అధికారులతో సమీక్షా సమావేశం నిర్వహించారు. ఈ సమావేశానికి రాష్ట్రంలోని ప్రముఖ 16 దేవాలయాల కార్యనిర్వహణాధికారులు హాజరయ్యారు. ఈ సందర్భంగా ఉపముఖ్యమంత్రి కొట్టు సత్యనారాయణ మాట్లాడుతూ.. రాష్ట్రంలోని అన్ని ఆలయాల్లో అవినీతికి తావులేకుండా భక్తులకు మెరుగైన పారదర్శక సేవలు అందించాలని ఆదేశించారు. మొత్తం 16 ప్రధాన ఆలయాల్లో ఆన్‌లైన్‌ విధానాన్ని అనుసరించాలని, కొన్ని చోట్ల విద్యుత్‌ అంతరాయం లేకుండా యూపీఎస్‌ వినియోగించాలని మంత్రి అధికారులకు సూచించారు. వచ్చే సమావేశం నాటికి మొత్తం 175 ఆలయాల్లో భక్తులకు కంప్యూటరైజ్డ్ ఆన్‌లైన్ సేవలు అందించాలని మంత్రి ఆదేశించారు.
ధూప దీప నైవేద్యం పథకం…
ఈ సమావేశంలో 185 దేవాలయాలకు ధూపదీప నైవేద్యం పథకం మంజూరుకు ప్రతిపాదనలు అందాయి. ప్రతిపాదనలు పరిశీలిస్తున్నట్లు మంత్రి వెల్లడించారు. అదేవిధంగా రాష్ట్రంలోని ఆలయాల ఈవోలందరికీ టెంపుల్ మేనేజ్‌మెంట్ సిస్టమ్ (టీఎంఎస్) (9&9 సాఫ్ట్‌వేర్)పై సాఫ్ట్‌వేర్‌పై పూర్తి అవగాహన ఉండాలని మంత్రి తెలిపారు. ప్రతి ఆలయంలో సంబంధిత ఏర్పాట్లు చేయాలని 9&9 సాఫ్ట్‌వేర్ కంపెనీకి మంత్రి సూచించారు. వచ్చే ఏడాది జనవరి 31 నాటికి 175 ఆలయాల్లో ఆన్‌లైన్‌ వ్యవస్థను పూర్తి స్థాయిలో అమలు చేయాలని మంత్రి ఆదేశాలు జారీ చేశారు.
ఫైనాన్షియల్ అకౌంటింగ్ సిస్టమ్స్ (FAS)….
సమావేశంలో ఫైనాన్షియల్ అకౌంటింగ్ సిస్టమ్స్‌లో ఆదాయ, రాబడుల వివరాలను మంత్రి కొట్టు సత్యనారాయణ పరిశీలించారు. దేవాదాయ శాఖ పరిధిలోని ఈఓలకు దీనిపై పూర్తి స్థాయిలో అవగాహన కల్పించాలని మంత్రి అన్నారు. దీనిపై వచ్చే సమీక్షా సమావేశం నాటికి కార్యనిర్వాహక అధికారులు స్వయంగా వివరణ ఇవ్వాలని మంత్రి ఆదేశించారు. తిరుమల తిరుపతి దేవస్థానం తరహాలో ప్రొటోకాల్‌ సెక్షన్‌ను అనుసరించేలా మార్గదర్శకాలు జారీ చేయాలని కమిషనర్‌ ఆదేశించారు. ఆలయాల్లో టెండర్ల ప్రక్రియ పారదర్శకంగా జరగాలి. ఆహార, పారిశుధ్య సిబ్బంది నియామకాన్ని పారదర్శకత టెండర్ల ద్వారానే చేపట్టాలని మంత్రి స్పష్టం చేశారు. ఈ సమావేశంలో రుణశాఖ కమిషనర్‌ ఎం.హరి జవహర్‌లాల్‌, అదనపు కమిషనర్‌ టి.చంద్రకుమార్‌, జాయింట్‌ కమిషనర్‌ ఎస్‌ఎస్‌.చంద్రశేఖర్‌ ఆజాద్‌ పాల్గొన్నారు.